ભેસ્તાનની સરકારી શાળામાં દારૂની મહેફિલનો વીડિયો વાયરલ..

ભેસ્તાન સરકારી શાળામાં દારૂ પાર્ટીનો મામલો સામે આવતાં સુરતના શિક્ષણ જગતમાં ચર્ચા જાગી છે. ભેસ્તાનના સિદ્ધાર્થ નગર વિસ્તારમાં આવેલી સરકારી શાળા ક્રમાંક 77 અને 248ના વર્ગખંડમાં રાત્રિના સમયે દારૂની મહેફિલ થતી હોવાનો વીડિયો વાયરલ થયો હતો. વિદ્યાના પવિત્ર ધામ સમાન શાળાના વર્ગખંડમાં આવી પ્રવૃત્તિનો વીડિયો સામે આવતાં સ્થાનિક નાગરિકોમાં પણ ભારે રોષ જોવા મળ્યો હતો. સમગ્ર મામલો સામે આવ્યા બાદ નગર પ્રાથમિક શિક્ષણ સમિતિ અને ભેસ્તાન પોલીસ દ્વારા કાર્યવાહી હાથ ધરવામાં આવી છે.

વાયરલ વીડિયો બાદ શિક્ષણ સમિતિએ શરૂ કરી તપાસ

શાળાના વર્ગખંડમાં રાત્રિના સમયે દારૂની મહેફિલ ચાલતી હોવાનો વીડિયો સોશિયલ મીડિયામાં વાયરલ થતાં સમગ્ર મામલો શિક્ષણ સમિતિના ધ્યાન પર આવ્યો હતો. ત્યારબાદ શિક્ષણ સમિતિ દ્વારા ઘટનાની તપાસ શરૂ કરવામાં આવી હતી.

તપાસ દરમિયાન શાળામાં ફરજ બજાવતા સિક્યોરિટી ગાર્ડ દ્વારા જ દારૂની પાર્ટી કરવામાં આવતી હોવાનું સામે આવ્યું હોવાની માહિતી આપવામાં આવી છે. આ બાબત સામે આવ્યા બાદ શિક્ષણ સમિતિ દ્વારા સિક્યોરિટી ગાર્ડ સામે કાર્યવાહી કરવામાં આવી હતી.

મળતી માહિતી અનુસાર સિક્યોરિટી ગાર્ડ બાળકોને શાળાના મેદાનમાં રમવા દેતો નહોતો. આ બાબતને લઈને બાળકોમાં નારાજગી હતી. આ દરમિયાન કેટલાક બાળકોએ રાત્રિના સમયે થતી દારૂની મહેફિલનો વીડિયો ઉતાર્યો હતો. ત્યારબાદ આ વીડિયો વાયરલ થતાં સમગ્ર ઘટના સામે આવી હતી.

સિક્યોરિટી ગાર્ડની હકાલપટ્ટી

વાયરલ વીડિયો અને શિક્ષણ સમિતિની તપાસ બાદ સંબંધિત સિક્યોરિટી ગાર્ડ સામે કડક કાર્યવાહી કરવામાં આવી છે. નગર પ્રાથમિક શિક્ષણ સમિતિ દ્વારા સિક્યોરિટી ગાર્ડની હકાલપટ્ટી કરવામાં આવી હોવાનું ચેરમેન રાજેન્દ્ર કાપડિયા દ્વારા જણાવવામાં આવ્યું છે.

બીજી તરફ વીડિયો સામે આવ્યા બાદ ભેસ્તાન પોલીસ દ્વારા પણ સમગ્ર મામલે કાર્યવાહી હાથ ધરવામાં આવી છે.

સરકારી શાળા બાળકોના શિક્ષણ અને ઘડતર સાથે જોડાયેલું સ્થળ છે ત્યારે શાળાના વર્ગખંડમાં દારૂની મહેફિલનો મામલો સામે આવતાં શાળાની સુરક્ષા અને રાત્રિના સમયે શાળા પરિસરની દેખરેખને લઈને પણ સવાલો ઊભા થયા છે.

આ ઘટનાને પગલે શાળાના પરિસરનો અનધિકૃત ઉપયોગ ન થાય અને આવી ઘટના ફરી ન બને તે માટે સુરક્ષા વ્યવસ્થા વધુ અસરકારક બનાવવાની જરૂરિયાત પણ સામે આવી છે.