ધનસુરા ના ધામણીયા ગામે અખિલ ભારતીય સંત પરિષદની બેઠક,.

ધામણીયા ગામે અખિલ ભારતીય સંત પરિષદની બેઠક યોજાઈ
માલપુર, મેઘરજ, મોડાસા, ધનસુરા અને બાયડ સહિતના સાધુ-સંતો અને મહંતોની હાજરીમાં સંપ્રદાયના વિવિધ મુદ્દાઓ પર ચર્ચા કરવામાં આવી.ધામણીયા અખિલ ભારતીય સંત પરિષદ બેઠકનું આયોજન અરવલ્લી જિલ્લાના ધનસુરા તાલુકાના ધામણીયા ગામે બાબા રામદેવજી મહારાજ મંદિરના પટાંગણમાં કરવામાં આવ્યું હતું. બેઠકમાં માલપુર, મેઘરજ, મોડાસા, ધનસુરા અને બાયડ સહિત વિવિધ તાલુકાના આશ્રમોના સાધુ-સંતો તેમજ મંદિરોના મહંતો ઉપસ્થિત રહ્યા હતા. બેઠક દરમિયાન સંપ્રદાયને લગતા વિવિધ મુદ્દાઓ પર વિસ્તૃત ચર્ચા-વિચારણા કરવામાં આવી હતી.

વિવિધ તાલુકાના સાધુ-સંતો અને મહંતો બેઠકમાં જોડાયા

ધનસુરા તાલુકાના ધામણીયા ગામે બાબા રામદેવજી મહારાજ મંદિર ખાતે સૂચિત અખિલ ભારતીય સંત પરિષદની બેઠક યોજાઈ હતી. આ પ્રસંગે અરવલ્લીના વિવિધ તાલુકામાં આવેલા આશ્રમો અને મંદિરો સાથે જોડાયેલા સાધુ-સંતો તથા મહંતોએ હાજરી આપી હતી.

કાર્યક્રમ દરમિયાન મહાધર્મના સંતોની જીવનશૈલી, આચાર-વિચાર અને તેમના યોગદાનને યાદ કરવામાં આવ્યું હતું. બેઠકમાં પરિષદ અને સંપ્રદાયને લગતા વિવિધ પ્રશ્નો અને મુદ્દાઓ અંગે ચર્ચા કરવામાં આવી હતી.

ધામણીયા નકલંક રામદેવ મંદિરના ગર્ભગૃહમાં અખિલ ભારતીય સંત પરિષદના મંત્રી પૂજ્ય રમણદાસ મહારાજ દ્વારા બાબા રામદેવજીની જ્યોત પ્રગટાવવામાં આવી હતી. ત્યારબાદ મંદિરના મહંત બાલકનાથ દ્વારા પૂજ્ય રમણદાસ મહારાજને બાબા રામદેવજીનો ફોટો અર્પણ કરીને સન્માનિત કરવામાં આવ્યા હતા.

બાબા રામદેવજીની જ્યોત પ્રગટાવી આરતી અને ધૂન કરાઈ

બેઠકમાં ઉપસ્થિત સાધુ-સંતો દ્વારા બાબા રામદેવજીની આરતી અને ધૂન કરવામાં આવી હતી. ધાર્મિક વાતાવરણ વચ્ચે યોજાયેલી બેઠક દરમિયાન પરિષદને લગતા પ્રશ્નો અંગે સાધુ-સંતોએ સૂચનો રજૂ કર્યા હતા.

આ સાથે પરિષદના નિયમોનું ચુસ્તપણે પાલન કરવા માટે સાધુ-સંતોનું ધ્યાન દોરવામાં આવ્યું હતું. સર્વ આલમની સુખાકારી જળવાઈ રહે તે હેતુથી સર્વો મંડપની સ્થાપના પણ કરવામાં આવી હતી.

કાર્યક્રમના અંતે મંદિરના મહંત બાલકનાથ દ્વારા ઉપસ્થિત સંતો માટે ભોજન ભંડારાનું આયોજન કરવામાં આવ્યું હતું. આમ, ધામણીયા ગામમાં યોજાયેલી અખિલ ભારતીય સંત પરિષદની બેઠકમાં ધાર્મિક કાર્યક્રમોની સાથે સંપ્રદાય અને પરિષદને લગતા વિવિધ મુદ્દાઓ પર ચર્ચા-વિચારણા કરવામાં આવી હતી.