દિવાળી સહિતના તહેવારો દરમિયાન ઉત્તર ભારત તરફ મુસાફરોની વધતી માંગને ધ્યાનમાં રાખીને પશ્ચિમ રેલવે દ્વારા ગુજરાત સ્પેશિયલ ટ્રેન સેવા હેઠળ ત્રણ જોડી સ્પેશિયલ ટ્રેનોની સેવાઓ લંબાવવામાં આવી છે. જેમાં અસારવા–આગ્રા કેન્ટ, અસારવા–કાનપુર સેન્ટ્રલ અને પ્રયાગરાજ તરફની સ્પેશિયલ ટ્રેનનો સમાવેશ થાય છે. આ ઉપરાંત ગાંધીગ્રામ–પ્રયાગરાજ સ્પેશિયલ ટ્રેનનું ટર્મિનલ બદલીને સાબરમતી કરવામાં આવ્યું છે. લંબાવવામાં આવેલી ટ્રેનોની બુકિંગ 19 સપ્ટેમ્બર, 2026થી શરૂ થશે.
અસારવા–આગ્રા કેન્ટ સ્પેશિયલ 24 નવેમ્બર સુધી
ટ્રેન નંબર 01909 અસારવા–આગ્રા કેન્ટ સ્પેશિયલની સેવા હવે 24 નવેમ્બર, 2026 સુધી લંબાવવામાં આવી છે.
તેની રિટર્ન સેવા ટ્રેન નંબર 01910 આગ્રા કેન્ટ–અસારવા સ્પેશિયલ 23 નવેમ્બર, 2026 સુધી દોડશે. તહેવારો દરમિયાન આગ્રા તરફ જતા મુસાફરોને આ ટ્રેન સેવા લંબાવવાથી વધુ વિકલ્પ ઉપલબ્ધ થશે.
અસારવા–કાનપુર સેન્ટ્રલ સ્પેશિયલ 1 ડિસેમ્બર સુધી
ટ્રેન નંબર 01906 અસારવા–કાનપુર સેન્ટ્રલ સ્પેશિયલની સેવા 1 ડિસેમ્બર, 2026 સુધી લંબાવવામાં આવી છે. તેની રિટર્ન ટ્રેન નંબર 01905 કાનપુર સેન્ટ્રલ–અસારવા સ્પેશિયલ 30 નવેમ્બર સુધી દોડશે.
ટ્રેન નંબર 01906ના ટુંડલા, ફિરોઝાબાદ અને ઇટાવા સ્ટેશનના સમયમાં 6 ઓક્ટોબરથી ફેરફાર કરવામાં આવ્યો છે. ટુંડલા ખાતે પ્લેટફોર્મ સંબંધિત મર્યાદાને કારણે આ ફેરફાર કરવામાં આવ્યો હોવાનું જણાવાયું છે. મુસાફરોને મુસાફરી પહેલાં પોતાના રિઝર્વેશનની વિગતો સાથે સુધારેલા સમયની તપાસ કરવાની સલાહ આપવામાં આવી છે.
ગાંધીગ્રામ–પ્રયાગરાજ ટ્રેન હવે સાબરમતીથી દોડશે
ગાંધીગ્રામ ખાતે પ્લેટફોર્મની મર્યાદિત ઉપલબ્ધતાને કારણે અગાઉ 4 ઓક્ટોબર, 2026થી ટ્રેન નંબર 04112 તરીકે શરૂ થનારી ગાંધીગ્રામ–પ્રયાગરાજ દ્વિ-સાપ્તાહિક સ્પેશિયલનું ટર્મિનલ બદલવામાં આવ્યું છે.
હવે આ ટ્રેન સાબરમતીથી ટ્રેન નંબર 04180 સાબરમતી–પ્રયાગરાજ દ્વિ-સાપ્તાહિક સ્પેશિયલ તરીકે દોડશે.
તેની રિટર્ન સેવા ટ્રેન નંબર 04111 પણ 3 ઓક્ટોબરથી સાબરમતી ખાતે ટર્મિનેટ થશે અને ટ્રેન નંબર 04179 પ્રયાગરાજ–સાબરમતી દ્વિ-સાપ્તાહિક સ્પેશિયલ તરીકે દોડશે.
સાબરમતી–પ્રયાગરાજ સ્પેશિયલનો સમય
ટ્રેન નંબર 04180 સાબરમતીથી સાંજે 5:45 વાગ્યે ઉપડશે અને બીજા દિવસે રાત્રે 8:00 વાગ્યે પ્રયાગરાજ પહોંચશે.
રિટર્ન ટ્રેન નંબર 04179 પ્રયાગરાજથી સાંજે 4:00 વાગ્યે ઉપડશે અને બીજા દિવસે બપોરે 3:40 વાગ્યે સાબરમતી પહોંચશે.
મહેસાણા અને ફતેહપુર વચ્ચે ટ્રેનના સમય અને સ્ટોપેજમાં કોઈ ફેરફાર કરવામાં આવ્યો નથી.
19 સપ્ટેમ્બરથી બુકિંગ શરૂ
લંબાવવામાં આવેલી ટ્રેન નંબર 01909, 01906 અને 04180ની મુસાફરી માટે બુકિંગ 19 સપ્ટેમ્બર, 2026થી શરૂ થશે. મુસાફરો PRS કાઉન્ટર તેમજ IRCTC મારફતે ટિકિટ બુક કરાવી શકશે.
તહેવારો દરમિયાન ઉત્તર ભારત તરફ મુસાફરોની અપેક્ષિત વધતી માંગને ધ્યાનમાં રાખીને ત્રણ જોડી સ્પેશિયલ ટ્રેનોની સેવાઓ લંબાવવામાં આવી છે.