ખાડીપૂરના કારણે સુરતની 8 પ્રાથમિક શાળાઓમાં 1.12 લાખથી વધુ પુસ્તકો અને શૈક્ષણિક સામગ્રીને નુકસાન. રાજ્ય સરકારે એક અઠવાડિયામાં નવા પુસ્તકો આપવાની ખાતરી આપી.
ખાડીપૂરથી સમિતિની આઠ શાળાઓ પ્રભાવિત થતાં સુરત શહેરમાં શિક્ષણ વ્યવસ્થાને મોટો ફટકો પડ્યો છે. ભારે વરસાદ બાદ આવેલા ખાડીપૂરના પાણી સુરત નગર પ્રાથમિક શિક્ષણ સમિતિની કુલ આઠ શાળાઓમાં ફરી વળતાં વિદ્યાર્થીઓના પુસ્તકો, યુનિફોર્મ, બૂટ, મોજાં, સ્કૂલ બેગ અને અન્ય શૈક્ષણિક કિટને વ્યાપક નુકસાન થયું છે. પૂર બાદ શાળાઓમાં પાણી ભરાઈ જતાં શિક્ષકો અને સ્ટાફને પુસ્તકો અને અન્ય સામગ્રી બચાવવા ભારે જહેમત ઉઠાવવી પડી હતી. આ ઘટનાથી હજારો વિદ્યાર્થીઓના અભ્યાસ પર સીધી અસર પહોંચી છે.
1.12 લાખથી વધુ પુસ્તકો અને શૈક્ષણિક સામગ્રીને નુકસાન
નગર પ્રાથમિક શિક્ષણ સમિતિના જણાવ્યા અનુસાર ખાડીપૂરના કારણે 1.12 લાખથી વધુ પુસ્તકો તેમજ અન્ય શૈક્ષણિક સામગ્રીને નુકસાન થયું છે. પાણી ભરાવાના કારણે પુસ્તકો ભીના થઈ જતાં શાળા સ્ટાફે તેને સૂકવવાનો પ્રયાસ કર્યો હતો, પરંતુ મોટાભાગની સામગ્રી ઉપયોગલાયક રહી નહોતી. વિદ્યાર્થીઓના યુનિફોર્મ, બૂટ, મોજાં અને અન્ય જરૂરી શૈક્ષણિક સાધનો પણ પાણીમાં તણાઈ ગયા હતા.
શૈક્ષણિક સામગ્રીને થયેલા નુકસાનના કારણે વિદ્યાર્થીઓના નિયમિત અભ્યાસમાં વિક્ષેપ સર્જાયો છે. ખાસ કરીને નવા શૈક્ષણિક સત્ર દરમિયાન પુસ્તકો ઉપલબ્ધ ન હોવાથી વિદ્યાર્થીઓને મુશ્કેલીનો સામનો કરવો પડી રહ્યો છે.
રાજ્ય સરકાર એક અઠવાડિયામાં નવા પુસ્તકો મોકલશે
આ ઘટનાને રાજ્ય સરકારે ગંભીરતાથી લઈને માનવીય અભિગમ દાખવ્યો છે. નગર પ્રાથમિક શિક્ષણ સમિતિ પાસેથી તમામ નુકસાનની વિગતવાર માહિતી માંગવામાં આવી હતી. ત્યારબાદ સમિતિએ અસરગ્રસ્ત આઠેય શાળાઓનો ડેટા તૈયાર કરીને રાજ્ય સરકારને મોકલી આપ્યો છે.
સમિતિના અધ્યક્ષ રાજેન્દ્ર કાપડિયાના જણાવ્યા મુજબ રાજ્ય સરકારે અસરગ્રસ્ત વિદ્યાર્થીઓ માટે એક અઠવાડિયાની અંદર 1.12 લાખથી વધુ નવા પુસ્તકો મોકલી આપવાની ખાતરી આપી છે. નવા પુસ્તકો મળ્યા બાદ વિદ્યાર્થીઓનો અભ્યાસ ફરી નિયમિત બની શકશે અને તેમને વધુ મુશ્કેલીનો સામનો કરવો નહીં પડે.
નગર પ્રાથમિક શિક્ષણ સમિતિએ પણ નુકસાનગ્રસ્ત શાળાઓમાં શિક્ષણ કાર્ય ઝડપથી સામાન્ય બનાવવા માટે કામગીરી શરૂ કરી છે. રાજ્ય સરકારના સહયોગથી વિદ્યાર્થીઓને નવી શૈક્ષણિક સામગ્રી ઉપલબ્ધ કરાવવામાં આવશે, જેથી તેમનો અભ્યાસ સતત ચાલુ રહી શકે.