મોડાસામાં મહિલા જાગૃતિ શિબિર, સશક્ત પરિવારના નિર્માણ પર ભાર

મોડાસામાં અરવલ્લી જિલ્લા ગાયત્રી પરિવાર દ્વારા મહિલા જાગૃતિ શિબિર યોજાઈ. મહિલાઓને આત્મવિશ્વાસ, સ્વાવલંબન અને સશક્ત પરિવારના નિર્માણનો સંદેશ અપાયો.,

મોડાસામાં મહિલા જાગૃતિ શિબિરનું આયોજન અરવલ્લી જિલ્લા ગાયત્રી પરિવાર દ્વારા કરવામાં આવ્યું હતું. મોડાસાના ડૉ. બાબાસાહેબ આંબેડકર ભવન ખાતે યોજાયેલી આ શિબિરમાં મોટી સંખ્યામાં મહિલાઓએ ભાગ લીધો હતો. અખિલ વિશ્વ ગાયત્રી પરિવાર, શાંતિકુંજ હરિદ્વારથી પ્રેરિત અરવલ્લી જિલ્લા ગાયત્રી પરિવાર દ્વારા આયોજિત કાર્યક્રમમાં મહિલાઓને આત્મવિશ્વાસ, સ્વાવલંબન, પરિવાર અને સમાજના નિર્માણમાં તેમની ભૂમિકા તેમજ ભારતીય સંસ્કૃતિમાં નારીના મહત્વ અંગે માર્ગદર્શન આપવામાં આવ્યું હતું.

પરિવાર અને સમાજના નિર્માણમાં મહિલાઓની ભૂમિકા

મહિલા જાગૃતિ શિબિરમાં મોડાસા નગરપાલિકા પ્રમુખ જયશ્રીબેન પટેલ મુખ્ય મહેમાન તરીકે ઉપસ્થિત રહ્યાં હતાં. તેમણે પરિવાર અને સમાજના નિર્માણમાં મહિલાઓની મહત્વપૂર્ણ ભૂમિકા અંગે પોતાના વિચારો રજૂ કર્યા હતા.

કાર્યક્રમમાં મહિલાઓ માત્ર પોતાના પરિવાર પૂરતી સીમિત નહીં રહે પરંતુ સમાજના વિકાસ અને નવી પેઢીના સંસ્કાર ઘડતરમાં પણ મહત્વપૂર્ણ ભૂમિકા ભજવી શકે છે તેવો સંદેશ આપવામાં આવ્યો હતો. મહિલાઓમાં આત્મવિશ્વાસ વધારવા અને તેમને વધુ સ્વાવલંબી બનાવવા અંગે પણ ચર્ચા કરવામાં આવી હતી.

શિબિરમાં ઉપસ્થિત મહિલાઓને પોતાના પરિવારની જવાબદારી સાથે સામાજિક ક્ષેત્રે સક્રિય ભૂમિકા ભજવવા માટે પ્રેરણા આપવામાં આવી હતી.

મહિલા સશક્તિકરણ સહિત વિવિધ વિષયો પર માર્ગદર્શન

શિબિરમાં વડોદરાનાં મીનાક્ષીબેન કાબરિયા અને પાયલબેન જે. પટેલ તેમજ સુરતનાં આશાબેન રાખોડિયા દ્વારા અલગ-અલગ વિષયો પર માર્ગદર્શન આપવામાં આવ્યું હતું.

વક્તાઓએ ભારતીય સંસ્કૃતિમાં નારીનું સ્થાન, મહિલા સશક્તિકરણ, પારિવારિક જવાબદારી અને મહિલા મંડળની સ્થાપના જેવા મુદ્દાઓ અંગે પોતાના વિચારો રજૂ કર્યા હતા. સમાજમાં મહિલાઓની ભાગીદારી વધે અને સંગઠિત રીતે વિવિધ સામાજિક પ્રવૃત્તિઓમાં મહિલાઓ આગળ આવે તે માટે મહિલા મંડળોની ભૂમિકા અંગે પણ સમજ આપવામાં આવી હતી.

કાર્યક્રમમાં મોટી સંખ્યામાં મહિલાઓની હાજરી જોવા મળી હતી. શિબિર દરમિયાન મહિલાઓને પરિવારની સાથે સમાજમાં પણ સકારાત્મક પરિવર્તન લાવવા માટે પોતાની ક્ષમતાનો ઉપયોગ કરવાનો સંદેશ આપવામાં આવ્યો હતો.

અંતે ‘જાગૃત નારી જ સશક્ત પરિવાર અને સંસ્કારી સમાજનું નિર્માણ કરી શકે છે’ તેવા સંદેશ સાથે મહિલા જાગૃતિ શિબિરનું સમાપન કરવામાં આવ્યું હતું.