પાનોલી ટ્રેન મોબાઇલ સ્નેચિંગ કેસનો સુરત રેલવે LCBએ ભેદ ઉકેલી બે આરોપીઓને ઝડપી પાડ્યા છે. પાનોલી રેલવે સ્ટેશન નજીક ચાલતી જયપુર-બાંદ્રા ટ્રેનમાં મુસાફરનો મોબાઇલ ઝૂંટવવાના પ્રયાસ દરમિયાન મુસાફર ટ્રેનમાંથી નીચે પટકાતાં તેનું મોત થયું હતું. આ ગંભીર કેસમાં CCTV ફૂટેજ અને હ્યુમન ઇન્ટેલિજન્સના આધારે તપાસ આગળ વધારી પોલીસે મુખ્ય આરોપી ઈશ્વર અને સહઆરોપી રાકેશ વસાવાની ધરપકડ કરી છે. આરોપીઓને રિમાન્ડ પર લઈ અન્ય ગુનાઓમાં તેમની સંડોવણી અંગે પણ વધુ તપાસ હાથ ધરવામાં આવી છે.
મોબાઇલ ઝૂંટવવાના પ્રયાસમાં મુસાફર ટ્રેનમાંથી પટકાયા
પોલીસના જણાવ્યા અનુસાર જયપુર-બાંદ્રા ટ્રેનમાં મુસાફરી કરી રહેલા અશોક ગુર્જર ટ્રેનના દરવાજા પાસે બેઠા હતા. આ દરમિયાન તેમનો મોબાઇલ ફોન ઝૂંટવવાનો પ્રયાસ કરવામાં આવ્યો હતો. મોબાઇલ સ્નેચિંગના પ્રયાસ દરમિયાન અશોક ગુર્જરે સંતુલન ગુમાવ્યું હતું અને તેઓ ચાલતી ટ્રેનમાંથી નીચે પટકાયા હતા.
ઘટનામાં ગંભીર ઈજા થતાં અશોક ગુર્જરનું મોત થયું હતું. સમગ્ર બનાવ બાદ ભરૂચ રેલવે પોલીસે અજાણ્યા આરોપીઓ સામે BNSની કલમ 105 હેઠળ ગુનો નોંધી તપાસ શરૂ કરી હતી.
આ કેસની ગંભીરતાને ધ્યાનમાં રાખીને આરોપીઓ સુધી પહોંચવા માટે અલગ-અલગ દિશામાં તપાસ હાથ ધરવામાં આવી હતી.
CCTV અને હ્યુમન ઇન્ટેલિજન્સથી આરોપીઓની ઓળખ
તપાસ દરમિયાન રેલવે પોલીસ અને LCB દ્વારા ઘટનાસ્થળ તેમજ આસપાસના વિસ્તારોના CCTV ફૂટેજની તપાસ કરવામાં આવી હતી. આ ઉપરાંત હ્યુમન ઇન્ટેલિજન્સનો પણ ઉપયોગ કરવામાં આવ્યો હતો. તેના આધારે આ કેસમાં ત્રણ આરોપીઓની ઓળખ થઈ હોવાનું પોલીસે જણાવ્યું છે.
પોલીસે કાર્યવાહી કરીને મુખ્ય આરોપી ઈશ્વર અને સહઆરોપી રાકેશ વસાવાને ઝડપી પાડ્યા છે. પોલીસના જણાવ્યા અનુસાર મુખ્ય આરોપી ઈશ્વર સામે અગાઉ 11 જેટલા ગુનાઓ નોંધાયેલા છે અને તે પાસા હેઠળ જેલ પણ જઈ ચૂક્યો છે.
પ્રાથમિક પૂછપરછ દરમિયાન આરોપીઓએ અન્ય છ મોબાઇલ ચોરીના બનાવોમાં સંડોવણી હોવાની કબૂલાત કરી હોવાનું પણ પોલીસે જણાવ્યું છે. હવે આ કેસોમાં તેમની ચોક્કસ ભૂમિકા અને ચોરાયેલા મોબાઇલ અંગે તપાસ કરવામાં આવી રહી છે.
ઝડપાયેલા બંને આરોપીઓને રિમાન્ડ પર લઈને પોલીસ દ્વારા વધુ પૂછપરછ હાથ ધરવામાં આવી છે. સાથે જ કેસમાં ઓળખાયેલા અન્ય આરોપીની ભૂમિકા અને સંડોવણી અંગે પણ તપાસ આગળ વધારવામાં આવી રહી છે.