અમરેલી ACBએ સાવરકુંડલા રૂરલ પોલીસના ASI શ્યામભાઈ બગડાને ₹5 હજારની લાંચ લેતા રંગેહાથ ઝડપી લાંચની સમગ્ર રકમ રિકવર કરી છે.
સાવરકુંડલા ASI લાંચ કેસમાં અમરેલી જિલ્લા ACBએ મોટી કાર્યવાહી કરી છે. સાવરકુંડલા રૂરલ પોલીસ સ્ટેશનમાં ફરજ બજાવતા ASI શ્યામભાઈ બગડાને ₹5 હજારની લાંચ લેતા રંગેહાથ ઝડપી પાડવામાં આવ્યા હોવાનું ACBની પ્રેસનોટમાં જણાવવામાં આવ્યું છે. ફરિયાદી લાંચની રકમ આપવા માંગતા ન હોવાથી તેમણે ACBના ટોલ ફ્રી નંબર 1064 પર સંપર્ક કરીને ફરિયાદ કરી હતી. ફરિયાદના આધારે ACBએ છટકું ગોઠવી કાર્યવાહી હાથ ધરી હતી.
₹10 હજારની લાંચ માંગ્યાનો આક્ષેપ
ACBની પ્રેસનોટ મુજબ ફરિયાદી અગાઉ દેશી દારૂનો ધંધો કરતા હતા, પરંતુ હાલમાં તેમણે આ ધંધો બંધ કરી દીધો હતો. તેમ છતાં ASI શ્યામભાઈ બગડાએ ફરિયાદીને ફરીથી દેશી દારૂનો ધંધો શરૂ કરવા માટે દબાણ કર્યું હોવાનો આક્ષેપ કરવામાં આવ્યો છે.
ફરિયાદમાં એવો પણ આક્ષેપ કરવામાં આવ્યો છે કે જો ફરિયાદી ધંધો નહીં કરે તો તેમની સામે ખોટા કેસ કરવામાં આવશે તેવી ધમકી આપવામાં આવી હતી. આ સમગ્ર મામલે આરોપી ASI દ્વારા ફરિયાદી પાસેથી ₹10 હજારની લાંચની માંગણી કરવામાં આવી હોવાનું ACB દ્વારા જણાવવામાં આવ્યું છે.
ત્યારબાદ લાંચની રકમને લઈને રકઝક થતાં આખરે ₹5 હજારમાં સોદો નક્કી થયો હોવાનું પ્રેસનોટમાં જણાવાયું છે. જોકે ફરિયાદી લાંચ આપવા ઇચ્છતા ન હોવાથી તેમણે ACBનો સંપર્ક કર્યો હતો.
ઓળીયા ગામની સીમમાં ACBએ ગોઠવ્યું છટકું
ACBએ ઓળીયા ગામની સીમમાં છટકું ગોઠવી ASI શ્યામભાઈ બગડાને ₹5 હજારની લાંચ સ્વીકારતા રંગેહાથ ઝડપી પાડ્યા હોવાનું જણાવ્યું છે.
ફરિયાદ મળ્યા બાદ અમરેલી જિલ્લા ACBની ટીમ દ્વારા સાવરકુંડલા તાલુકાના ઓળીયા ગામની સીમમાં છટકું ગોઠવવામાં આવ્યું હતું. ACBના જણાવ્યા પ્રમાણે છટકાની કાર્યવાહી દરમિયાન ASI શ્યામભાઈ બગડાને ફરિયાદી પાસેથી ₹5 હજારની લાંચ સ્વીકારતા રંગેહાથ ઝડપી પાડવામાં આવ્યા હતા.
કાર્યવાહી દરમિયાન ACBની ટીમે લાંચની ₹5 હજારની સમગ્ર રકમ રિકવર કરી હતી. ત્યારબાદ આરોપી ASI સામે ભ્રષ્ટાચાર નિવારણ અધિનિયમની સંબંધિત જોગવાઈઓ હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.
ACB હવે સમગ્ર મામલે વધુ તપાસ કરી રહી છે. ફરિયાદમાં કરવામાં આવેલા આક્ષેપો, લાંચની માંગણી અને અન્ય સંબંધિત પાસાઓ અંગે તપાસ આગળ વધારવામાં આવી છે.