સુરત જિલ્લામાં ભારે વરસાદથી પૂર જેવી સ્થિતિ સર્જાતા અનેક ગામો અને નીચાણવાળા વિસ્તારોમાં જનજીવન પ્રભાવિત બન્યું છે. સતત વરસી રહેલા ધોધમાર વરસાદને કારણે રસ્તાઓ પર પાણી ફરી વળ્યા છે અને અનેક વિસ્તારોમાં પાણી ભરાઈ જતાં લોકો મુશ્કેલીમાં મુકાયા છે. પરિસ્થિતિની ગંભીરતાને ધ્યાનમાં રાખીને સુરત જિલ્લા કલેક્ટર તેજસ પરમાર અને જિલ્લા પોલીસ અધિક્ષક (SP) રાજેશ ગઢિયાએ અધિકારીઓ સાથે પૂરગ્રસ્ત વિસ્તારોની મુલાકાત લઈ સ્થળ પરની સ્થિતિની સમીક્ષા કરી હતી. માંગરોળ વિધાનસભાના ધારાસભ્ય ગણપત વસાવા પણ આ દરમિયાન ઉપસ્થિત રહી અસરગ્રસ્ત વિસ્તારોની મુલાકાત લીધી હતી.
કલેક્ટર અને એસપીએ પૂરગ્રસ્ત વિસ્તારોની સમીક્ષા કરી
ભારે વરસાદને કારણે અનેક ગામોમાં પાણી ભરાઈ જતાં સામાન્ય જનજીવન પર વ્યાપક અસર જોવા મળી રહી છે. જિલ્લા કલેક્ટર તેજસ પરમાર અને જિલ્લા એસપી રાજેશ ગઢિયાએ સંબંધિત વિભાગના અધિકારીઓ સાથે અસરગ્રસ્ત વિસ્તારોની મુલાકાત લઈને રાહત અને બચાવ કામગીરી અંગે જરૂરી સૂચનાઓ આપી હતી. સ્થળ પર પાણીની સ્થિતિ, લોકોને પડતી મુશ્કેલીઓ અને બચાવ કામગીરીની સમીક્ષા કરવામાં આવી હતી.
જિલ્લા વહીવટી તંત્ર દ્વારા સતત પરિસ્થિતિ પર નજર રાખવામાં આવી રહી છે. જ્યાં જરૂર જણાઈ રહી છે ત્યાં લોકોને સુરક્ષિત સ્થળે ખસેડવાની કામગીરી હાથ ધરવામાં આવી રહી છે. તંત્ર દ્વારા વિવિધ વિભાગો વચ્ચે સતત સંકલન જાળવી રાખવામાં આવ્યું છે.
પોલીસ, ફાયર અને SDRFની ટીમો સતત કામગીરીમાં
ભારે વરસાદ વચ્ચે પોલીસ, ફાયર બ્રિગેડ અને SDRFની ટીમો સતત રાહત અને બચાવ કામગીરીમાં વ્યસ્ત છે. પાણી ભરાયેલા વિસ્તારોમાંથી લોકોને સુરક્ષિત સ્થળે પહોંચાડવા માટે રેસ્ક્યૂ ઓપરેશન હાથ ધરવામાં આવી રહ્યા છે. સાથે જ સંભવિત જોખમવાળા વિસ્તારોમાં સતત પેટ્રોલિંગ કરીને લોકોની સુરક્ષા સુનિશ્ચિત કરવામાં આવી રહી છે.
માંગરોળના ધારાસભ્ય ગણપત વસાવાએ પણ અસરગ્રસ્ત વિસ્તારોની મુલાકાત લઈને સ્થાનિક લોકો સાથે ચર્ચા કરી હતી અને તંત્ર દ્વારા ચાલી રહેલી કામગીરીની માહિતી મેળવી હતી. જિલ્લા વહીવટી તંત્રએ લોકોને બિનજરૂરી રીતે બહાર ન નીકળવા, નદી-નાળા અને પાણી ભરાયેલા રસ્તાઓથી દૂર રહેવા તેમજ માત્ર સત્તાવાર સૂચનાઓનું પાલન કરવાની અપીલ કરી છે.
ભારે વરસાદની પરિસ્થિતિને ધ્યાનમાં રાખીને સુરત જિલ્લામાં તમામ સંબંધિત વિભાગોને એલર્ટ પર રાખવામાં આવ્યા છે અને પરિસ્થિતિ સામાન્ય ન થાય ત્યાં સુધી રાહત અને બચાવ કામગીરી સતત ચાલુ રહેશે.