સુરત સ્મીમેર હોસ્પિટલના MRIડિપાર્ટમેન્ટમાં બેદરકારીના આક્ષેપ

સ્મીમેર હોસ્પિટલ MRI ડિપાર્ટમેન્ટમાં રિપેરિંગની કામગીરીને લઈને ગંભીર બેદરકારીના આક્ષેપ સામે આવ્યા છે. સુરત મહાનગરપાલિકા સંચાલિત સ્મીમેર હોસ્પિટલના MRI ડિપાર્ટમેન્ટમાં છ મહિના પહેલાં બનેલી દીવાલોનું ફરી રિપેરિંગ શરૂ કરવામાં આવ્યું હોવાનું જણાવાયું છે. રિપેરિંગ દરમિયાન સિમેન્ટ અને રેતીની ડસ્ટ સતત ઉડી રહી હોવા છતાં આ જ વાતાવરણમાં દર્દીઓની તપાસ ચાલુ રાખવામાં આવતી હોવાનો આક્ષેપ કરવામાં આવ્યો છે. સમગ્ર મામલે દર્દીઓની સલામતી તેમજ મોંઘા મેડિકલ સાધનોની જાળવણીને લઈને સવાલો ઊભા થયા છે.

સિમેન્ટ-રેતીની ડસ્ટ વચ્ચે દર્દીઓની તપાસનો આક્ષેપ

સ્મીમેર હોસ્પિટલના MRI ડિપાર્ટમેન્ટમાં ચાલી રહેલા રિપેરિંગના કારણે આસપાસના વિસ્તારમાં સિમેન્ટ અને રેતીની ધૂળ ફેલાઈ રહી હોવાનું સામે આવ્યું છે. આ જ વિસ્તારમાં CT સ્કેન, MRI અને X-Ray સહિતની તપાસ માટે દર્દીઓની અવરજવર ચાલુ હોવાનું જણાવાયું છે.

આક્ષેપ મુજબ ધૂળિયા વાતાવરણને કારણે દર્દીઓને શ્વાસ લેવામાં મુશ્કેલી પડી શકે છે. ખાસ કરીને સ્ટીચ લીધેલા અથવા અન્ય સારવાર હેઠળના દર્દીઓમાં ચેપનું જોખમ વધવાની ભીતિ વ્યક્ત કરવામાં આવી રહી છે. જોકે દર્દીઓમાં સેપ્ટિક ફેલાવાની શક્યતા અંગે સત્તાવાર તબીબી પુષ્ટિ સામે આવી નથી.

હોસ્પિટલ જેવા સંવેદનશીલ સ્થળે રિપેરિંગ દરમિયાન દર્દીઓની સુરક્ષા અને સ્વચ્છતા જળવાઈ રહે તે માટે જરૂરી તકેદારી રાખવામાં આવી રહી છે કે કેમ તે અંગે પણ સવાલો ઊઠ્યા છે.

કરોડોના મેડિકલ મશીનોની સુરક્ષા સામે પણ સવાલ

MRI, CT સ્કેન અને X-Ray જેવા મેડિકલ સાધનો અત્યંત સંવેદનશીલ હોય છે. રિપેરિંગ દરમિયાન ઉડતી ડસ્ટ આવા સાધનો સુધી પહોંચે તો તેની કામગીરી પર અસર થવાની આશંકા વ્યક્ત કરવામાં આવી છે. જોકે મશીનોને કોઈ નુકસાન થયું હોવાની સત્તાવાર માહિતી સામે આવી નથી.

બીજી તરફ સૌથી મોટો સવાલ બાંધકામની ગુણવત્તાને લઈને ઊભો થયો છે. છ મહિના પહેલાં બનાવવામાં આવેલી દીવાલોમાં ફરી રિપેરિંગ કરવાની જરૂર કેમ પડી તે અંગે તંત્રની કામગીરી સામે પ્રશ્નો ઉઠાવવામાં આવી રહ્યા છે.

દર્દીઓની તપાસ ચાલુ હોય તેવા વિભાગમાં રિપેરિંગ કામગીરી દરમિયાન ધૂળને નિયંત્રિત કરવા માટે શું વ્યવસ્થા કરવામાં આવી છે અને દર્દીઓ તેમજ મેડિકલ સાધનોની સુરક્ષા માટે કયા પગલાં લેવામાં આવ્યા છે તે અંગે સ્પષ્ટતા થાય તેવી માંગ ઊઠી છે.

હાલ સમગ્ર મામલે જવાબદાર અધિકારીઓ સામે બેદરકારીના આક્ષેપ કરવામાં આવ્યા છે. હવે સુરત મહાનગરપાલિકા અને સ્મીમેર હોસ્પિટલ તંત્ર આ મામલે શું સ્પષ્ટતા કરે છે અને દર્દીઓની સુરક્ષાને ધ્યાનમાં રાખીને શું કાર્યવાહી કરે છે તેના પર નજર રહેશે.