વલસાડની ચૈતાલીબેન માટીનાગણપતિ બનાવી પર્યાવરણ સંરક્ષણનો સંદેશ

વલસાડ માટીના ગણપતિ બનાવવાની અનોખી પહેલ દ્વારા ચૈતાલીબેન રાજપૂત અને તેમની મહિલા ટીમ પર્યાવરણ સંરક્ષણનો સંદેશ આપી રહી છે. ગણેશ ચતુર્થીની તૈયારીઓ વચ્ચે કલકત્તા અને મોરબીથી વિશેષ માટી મંગાવી શુદ્ધ માટીના ગણપતિ બાપ્પાની મૂર્તિઓ તૈયાર કરવામાં આવી છે. આ પહેલ સાથે સ્થાનિક હસ્તકલાને પ્રોત્સાહન આપવા અને મહિલાઓને આત્મનિર્ભર બનાવવાનો પણ પ્રયાસ કરવામાં આવી રહ્યો છે.

વર્ષ 2016માં એક મૂર્તિથી થઈ હતી શરૂઆત

ફાઈન આર્ટ્સમાં એપ્લાઈડ આર્ટનો અભ્યાસ કરનાર વલસાડના ચૈતાલીબેન રાજપૂતે વર્ષ 2016માં આ કાર્યની શરૂઆત કરી હતી. શરૂઆતમાં તેમણે માત્ર માટી અને પાણીના મિશ્રણથી ગણેશજીની એક મૂર્તિ તૈયાર કરી હતી.

તેમના આ પ્રયાસને લોકો તરફથી સારો પ્રતિસાદ મળતાં દર વર્ષે માટીની ગણેશ મૂર્તિઓની સંખ્યા વધતી ગઈ. ચાલુ વર્ષે ચૈતાલીબેને પોતાની મહિલા ટીમ સાથે મળીને અંદાજે 60 જેટલી માટીની ગણેશ મૂર્તિઓ તૈયાર કરી છે.

આ મૂર્તિઓ 6 ઈંચથી લઈને સાડા ત્રણ ફૂટ સુધીની છે. મૂર્તિઓ તૈયાર કરવા માટે કલકત્તા અને મોરબીથી વિશેષ માટી મંગાવવામાં આવી હોવાનું જણાવવામાં આવ્યું છે.

ચૈતાલીબેનના જણાવ્યા અનુસાર માટીની ગણેશ મૂર્તિ વિસર્જન બાદ પાણીમાં ઓગળી જાય છે અને ફરી પ્રકૃતિમાં ભળી જાય છે. આ કારણે તેઓ માટીના ગણપતિ દ્વારા પર્યાવરણ સંરક્ષણનો સંદેશ આપી રહ્યાં છે.

‘વોકલ ફોર લોકલ’ સાથે મહિલાઓને આત્મનિર્ભર બનાવવાનો પ્રયાસ

વડાપ્રધાન નરેન્દ્ર મોદીના ‘વોકલ ફોર લોકલ’ના આહવાન બાદ લોકોમાં માટીની મૂર્તિઓ અંગે જાગૃતિ વધી રહી હોવાનું ચૈતાલીબેને જણાવ્યું છે. તેમની પહેલ માત્ર મૂર્તિ નિર્માણ પૂરતી સીમિત નથી, પરંતુ આ હસ્તકલાને જીવંત રાખવાનો પ્રયાસ પણ કરવામાં આવી રહ્યો છે.

ચૈતાલીબેન દ્વારા અન્ય મહિલાઓને આ હસ્તકલાની તાલીમ આપી રોજગારી અને આત્મનિર્ભરતા તરફ આગળ વધારવાનો પ્રયાસ કરવામાં આવી રહ્યો છે.

આ પહેલમાં બાળકો પણ જોડાયા છે. કોસંબાના કુસુમ વિદ્યાલયમાં અભ્યાસ કરતા બાળકોએ પોતાની પોકેટ મનીમાંથી માટીના બાપ્પાની મૂર્તિઓ ખરીદી પર્યાવરણ સંરક્ષણનો સંદેશ આપ્યો હતો.

આમ, ગણેશ ચતુર્થી પહેલાં વલસાડમાં ચૈતાલીબેન રાજપૂત અને તેમની મહિલા ટીમ દ્વારા માટીના ગણપતિ તૈયાર કરીને પર્યાવરણ સંરક્ષણ, સ્થાનિક હસ્તકલા અને મહિલા આત્મનિર્ભરતાનો સંદેશ આપવામાં આવી રહ્યો છે.