અંકલેશ્વરમાં ગાંજો ઝડપાયો હોવાનો વધુ એક મામલો સામે આવ્યો છે. પાનોલી પોલીસે બાકરોલ બ્રિજ નજીક સર્વિસ રોડ પર વોચ ગોઠવી 3.941 કિલોગ્રામ ગાંજાના જથ્થા સાથે એક શખ્સને ઝડપી પાડ્યો છે. પોલીસે ગાંજો અને મોબાઈલ ફોન સહિત કુલ ₹2 લાખ 27 હજારનો મુદ્દામાલ જપ્ત કર્યો છે. આ ઉપરાંત ગાંજાની હેરાફેરીમાં સંડોવાયેલા હોવાનું જણાવાયેલા અન્ય બે શખ્સોને વોન્ટેડ જાહેર કરવામાં આવ્યા છે.
બાકરોલ બ્રિજ પાસે પોલીસે ગોઠવી હતી વોચ
પાનોલી પોલીસે બાકરોલ બ્રિજ નજીકથી 3.941 કિલો ગાંજા સાથે એક શખ્સને ઝડપી પાડ્યો. ₹2.27 લાખનો મુદ્દામાલ જપ્ત કરી બે શખ્સોને વોન્ટેડ જાહેર કરાયા.
પાનોલી પોલીસને બાતમી મળી હતી કે સુભેન્દુશેખર પ્રેમચંદ દેબ નામનો ઈસમ બાકરોલ બ્રિજથી સંજાલી મહારાજા નગર તરફ ગાંજાનો જથ્થો લઈને પસાર થવાનો છે. આ બાતમીના આધારે પોલીસની ટીમે બાકરોલ બ્રિજ નજીક આવેલા સર્વિસ રોડ પર વોચ ગોઠવી હતી.
દરમિયાન બાતમીના વર્ણન મુજબનો શખ્સ ત્યાંથી પસાર થતાં પોલીસે તેને અટકાવ્યો હતો. તેની તલાશી લેવામાં આવતાં તેની પાસેથી 3.941 કિલોગ્રામ ગાંજાનો જથ્થો મળી આવ્યો હોવાનું પોલીસે જણાવ્યું છે.
પોલીસના જણાવ્યા પ્રમાણે કબજે કરવામાં આવેલા ગાંજાની કિંમત આશરે ₹1 લાખ 97 હજાર થાય છે. પોલીસે ગાંજાનો જથ્થો કબજે કરવાની સાથે મોબાઈલ ફોન પણ જપ્ત કર્યો હતો. સમગ્ર કાર્યવાહીમાં કુલ ₹2 લાખ 27 હજારનો મુદ્દામાલ જપ્ત કરવામાં આવ્યો છે.
બે શખ્સોને વોન્ટેડ જાહેર કરાયા
પાનોલી પોલીસે આ મામલે સુભેન્દુશેખર પ્રેમચંદ દેબની ધરપકડ કરી આગળની કાયદેસરની કાર્યવાહી હાથ ધરી છે. સાથે જ ગાંજાની હેરાફેરીમાં કથિત રીતે સંડોવાયેલા રાજેશ અને મહેન્દ્ર નામના બે શખ્સોને વોન્ટેડ જાહેર કરવામાં આવ્યા હોવાનું જણાવાયું છે.
પોલીસ હવે ઝડપાયેલા ગાંજાનો જથ્થો ક્યાંથી લાવવામાં આવ્યો હતો અને કોને પહોંચાડવાનો હતો તે સહિતની વિગતો અંગે તપાસ કરી રહી છે. વોન્ટેડ જાહેર કરાયેલા બંને શખ્સોની ભૂમિકા અંગે પણ તપાસ આગળ વધારવામાં આવી છે.
સમગ્ર કેસની વધુ તપાસ હાંસોટ પોલીસ મથકના PI નયન વસાવા દ્વારા હાથ ધરવામાં આવી છે. હાલ એક આરોપીની ધરપકડ કરવામાં આવી છે, જ્યારે અન્ય બે શખ્સોને વોન્ટેડ જાહેર કરીને પોલીસ દ્વારા આગળની કાર્યવાહી કરવામાં આવી રહી છે.