અરવલ્લી જિલ્લાના શામળાજી ખાતે શામળિયા ભગવાનના પવિત્ર મંદિર પરિસરમાં આંતરરાષ્ટ્રીય યોગ દિવસની ઉજવણી કરવામાં આવી હતી. માનનીય મંત્રીશ્રી પી.સી. બરંડાના અધ્યક્ષસ્થાને આયોજિત આ કાર્યક્રમમાં યોગાભ્યાસનું વ્યાપક પ્રદર્શન કરવામાં આવ્યું હતું.મંત્રીશ્રીએ સંબોધન કરતા જણાવ્યું હતું કે યોગ એ માત્ર શારીરિક વ્યાયામ નથી પરંતુ મન, શરીર અને આત્માના સંતુલનનો અમૂલ્ય વારસો છે. તેમણે યોગના દૈનિક અભ્યાસથી આરોગ્ય, તનાવમુક્તિ અને આધ્યાત્મિક વિકાસના અનેક લાભો વિશે વિસ્તારથી વાત કરી હતી અને જનતાને યોગને જીવનનો અવિચ્છેદ્ય અંગ બનાવવા અપીલ કરી હતી.કાર્યક્રમ દરમિયાન વિવિધ યોગ આસનો, પ્રાણાયામ અને ધ્યાનના સત્રોનું આયોજન કરવામાં આવ્યું હતું. યોગ શિક્ષકો અને નિષ્ણાતો દ્વારા જનસાધારણને યોગની સરળ અને અસરકારક પદ્ધતિઓ દર્શાવવામાં આવી હતી. આ પ્રસંગે શામળાજી મંદિર પરિસરમાં યોગના મહત્વ પર આધારિત પોસ્ટર્સ અને બેનરો દ્વારા જાગૃતિ અભિયાન પણ ચલાવવામાં આવ્યું હતું.આ કાર્યક્રમમાં અરવલ્લી જિલ્લાના અધિકારીશ્રીઓ, પદાધિકારીઓ, પોલીસ જવાનો, શાળા-કોલેજના વિદ્યાર્થીઓ તેમજ નાગરિકોની મોટી સંખ્યામાં ઉપસ્થિતિ જોવા મળી હતી. સૌએ ઉત્સાહપૂર્વક યોગાભ્યાસમાં ભાગ લીધો અને યોગને પ્રોત્સાહન આપવાના સંકલ્પ સાથે કાર્યક્રમનો અંત આવ્યો હતો.