ગુજરાત હાઈકોર્ટના પરિપત્રમાં ફેરફાર, વકીલોને મોટી રાહત...

વકીલોના વિરોધ અને રજૂઆત બાદ ગુજરાત હાઈકોર્ટના પરિપત્રમાં ફેરફાર કરાયા. તાત્કાલિક કેસોમાં હવે હસ્તલિખિત અરજી સ્વીકારવામાં આવશે.,

ગુજરાત હાઈકોર્ટના પરિપત્રમાં ફેરફાર કરવામાં આવતાં રાજ્યભરમાં કોર્ટમાં પ્રેક્ટિસ કરતા વકીલોને મોટી રાહત મળવાની આશા છે. કોર્ટમાં દાખલ થતી અરજીઓ માટે A4 સાઇઝના પેપર, બંને તરફ ટાઇપિંગ અને નિર્ધારિત ફોન્ટ સહિતના નિયમોને લઈને વકીલોમાં વિરોધ જોવા મળ્યો હતો. વિવિધ વકીલ મંડળો દ્વારા કરવામાં આવેલી રજૂઆતો બાદ પરિપત્રમાં મહત્ત્વના ફેરફાર કરવામાં આવ્યા છે. વકીલ મંડળના જણાવ્યા મુજબ સુધારા બાદ તેમની આશરે 90 ટકા માંગણીઓ સંતોષાઈ છે.

તાત્કાલિક કેસોમાં હસ્તલિખિત અરજી સ્વીકારાશે

સુધારેલા નિયમોમાં સૌથી મહત્ત્વની રાહત તાત્કાલિક કેસોને લઈને આપવામાં આવી હોવાનું જણાવાયું છે. આરોપીની ગેરહાજરી અથવા અન્ય કોઈ તાત્કાલિક કાયદાકીય કામગીરીની સ્થિતિમાં હવે હાથથી લખેલી એટલે કે હસ્તલિખિત અરજી સ્વીકારવામાં આવશે.

અગાઉ ટાઇપિંગ અને નિર્ધારિત ફોન્ટના નિયમોને કારણે તાત્કાલિક અરજી કરવાની સ્થિતિમાં વકીલોને વ્યવહારિક મુશ્કેલીઓ પડી શકે તેવી રજૂઆત કરવામાં આવી હતી. વકીલ મંડળોએ આ મુદ્દો હાઈકોર્ટ સમક્ષ રજૂ કર્યો હતો. હવે તાત્કાલિક કેસોમાં હસ્તલિખિત અરજીની મંજૂરી મળવાથી આવી મુશ્કેલીઓમાં ઘટાડો થવાની આશા છે.

ગુજરાતી અરજીઓના ફોન્ટ અંગે પણ રાહત

ગુજરાતી ભાષામાં દાખલ કરવામાં આવતી અરજીઓ માટે પણ સમાન પ્રકારના યોગ્ય ફોન્ટનો ઉપયોગ કરવાની મંજૂરી આપવામાં આવી હોવાનું જણાવાયું છે. જેના કારણે ચોક્કસ એક જ ફોન્ટને લઈને ઊભી થતી વ્યવહારિક સમસ્યામાં વકીલોને રાહત મળશે.

વકીલોનું કહેવું છે કે તેમને A4 સાઇઝના પેપર અને પેપરની બંને તરફ ટાઇપિંગ કરવાના નિયમ સામે કોઈ ખાસ વાંધો નહોતો. મુખ્ય વિરોધ ટાઇપિંગ અને નિર્ધારિત ફોન્ટ સંબંધિત કડક નિયમો અચાનક અમલમાં મૂકવાને લઈને હતો.

વિવિધ વકીલ મંડળો દ્વારા રજૂઆત અને વિરોધ બાદ નિયમોમાં ફેરફાર કરવામાં આવતાં હવે કોર્ટની રોજિંદી કામગીરી વધુ સરળ બનવાની આશા વ્યક્ત કરવામાં આવી રહી છે. વકીલ મંડળના દાવા પ્રમાણે તેમની આશરે 90 ટકા માંગણીઓ સ્વીકારવામાં આવી છે.

પરિપત્રમાં થયેલા આ ફેરફારથી સુરત સહિત સમગ્ર ગુજરાતની વિવિધ કોર્ટોમાં પ્રેક્ટિસ કરતા વકીલોને અરજી દાખલ કરવાની પ્રક્રિયામાં મોટી વ્યવહારિક રાહત મળી શકે છે.