વિશ્વપ્રસિદ્ધ બોટાદ જિલ્લાના સાળંગપુરધામ ખાતે અમાસના પાવન અવસરે શ્રી કષ્ટભંજનદેવ હનુમાનજીનો ભવ્ય અને દિવ્ય શસ્ત્ર શૃંગાર કરવામાં આવ્યો હતો. આ દિવ્ય શૃંગારના દર્શન કરવા માટે ગુજરાતના વિવિધ જિલ્લાઓ ઉપરાંત રાજ્ય બહારથી પણ હજારોની સંખ્યામાં ભક્તો સાળંગપુરધામ પહોંચ્યા હતા. વહેલી સવારથી જ મંદિર પરિસરમાં ભક્તોની લાંબી કતારો જોવા મળી હતી અને સમગ્ર ધામ ભક્તિ, આસ્થા તેમજ "જય કષ્ટભંજનદેવ"ના ગુંજતા જયઘોષથી ગુંજી ઉઠ્યું હતું.
અમાસે સાળંગપુરધામમાં શ્રી કષ્ટભંજનદેવનો દિવ્ય શસ્ત્ર શૃંગાર, હજારો ભક્તોએ કર્યા દર્શન
વિશ્વપ્રસિદ્ધ સાળંગપુરધામ ખાતે અમાસ નિમિત્તે શ્રી કષ્ટભંજનદેવ હનુમાનજી નો કિંમતી આભૂષણો, ચાંદીના મુકુટ, પરંપરાગત શસ્ત્રોથી ભવ્ય શસ્ત્ર શૃંગાર કરવામાં આવ્યો.... પરમ પૂજ્ય શાસ્ત્રી સ્વામી હરિપ્રકાશદાસજીની પ્રેરણાથી અમાસ નિમિત્તે આ વિશેષ શસ્ત્ર શૃંગારનું આયોજન કરવામાં આવ્યું હતું. ધાર્મિક કાર્યક્રમોની શરૂઆત વહેલી સવારે મંગળા આરતીથી થઈ હતી. ત્યારબાદ શણગાર આરતી યોજાઈ હતી, જેમાં શ્રી કષ્ટભંજનદેવને અત્યંત ભવ્ય અને આકર્ષક સ્વરૂપમાં શણગારવામાં આવ્યા હતા.
આ પ્રસંગે દાદાને ચાંદીના મયૂરાકાર મુકુટ, સુંદર વસ્ત્રો અને કિંમતી આભૂષણોથી અલંકૃત કરવામાં આવ્યા હતા. સાથે જ ભાલા, તલવાર, ઢાલ, ધનુષ-બાણ, પરશુ અને કટાર જેવા પરંપરાગત શસ્ત્રોથી વિશેષ શસ્ત્ર શૃંગાર કરવામાં આવ્યો હતો. દાદાનું આ વિરાટ અને દિવ્ય સ્વરૂપ ભક્તો માટે વિશેષ આકર્ષણનું કેન્દ્ર બન્યું હતું. મોટી સંખ્યામાં આવેલા શ્રદ્ધાળુઓએ ભાવપૂર્વક દર્શન કરી આશીર્વાદ મેળવ્યા હતા.
મંદિર ટ્રસ્ટ દ્વારા દર્શન માટે વિશેષ વ્યવસ્થા ગોઠવવામાં આવી હતી જેથી મોટી સંખ્યામાં આવતા ભક્તોને કોઈ મુશ્કેલી ન પડે. મંદિર પરિસરમાં સ્વયંસેવકો દ્વારા દર્શનાર્થીઓને માર્ગદર્શન આપવામાં આવ્યું હતું અને સમગ્ર આયોજન સુવ્યવસ્થિત રીતે પૂર્ણ થયું હતું.
અમાસના આ પવિત્ર દિવસે ભક્તોએ પોતાના પરિવારના સુખ, શાંતિ, સમૃદ્ધિ અને આરોગ્ય માટે શ્રી કષ્ટભંજનદેવ સમક્ષ પ્રાર્થના કરી હતી. ઘણા ભક્તોએ દાદાના દર્શનને પોતાના જીવનની આધ્યાત્મિક અનુભૂતિ ગણાવી હતી. સાળંગપુરધામમાં યોજાતા આવા વિશેષ શૃંગાર અને ધાર્મિક કાર્યક્રમો દર વર્ષે લાખો શ્રદ્ધાળુઓની આસ્થાનું કેન્દ્ર બને છે.
દિવસભર મંદિર પરિસરમાં ભક્તિમય માહોલ જોવા મળ્યો હતો. શ્રી કષ્ટભંજનદેવના દિવ્ય શસ્ત્ર શૃંગારના દર્શને ભક્તોને આધ્યાત્મિક શાંતિ અને અલૌકિક આનંદની અનુભૂતિ કરાવી હતી. સમગ્ર સાળંગપુરધામ ભક્તિ, શ્રદ્ધા અને સનાતન પરંપરાના રંગમાં રંગાઈ ગયું હતું.