સુરતના અડાજણ વિસ્તારમાં ડૉ. અગ્રવાલ આઈ હોસ્પિટલની નવી શાખાનું ભવ્ય ઉદ્ઘાટન કરવામાં આવ્યું છે. હવે સુરતના લોકોને આધુનિક ટેક્નોલોજી અને નિષ્ણાત તબીબોની સેવાઓ સાથે એક જ છત નીચે સર્વગ્રાહી નેત્ર સારવાર ઉપલબ્ધ બનશે. હોસ્પિટલના ઉદ્ઘાટન પ્રસંગે નાયબ મુખ્યમંત્રી હર્ષ સંઘવી ઉપસ્થિત રહ્યા હતા. તેમણે હોસ્પિટલના વિવિધ વિભાગોની મુલાકાત લઈ આધુનિક સુવિધાઓની માહિતી મેળવી હતી.
અડાજણમાં ડૉ. અગ્રવાલ આઈ હોસ્પિટલનું ઉદ્ઘાટન, આધુનિક ટેક્નોલોજી સાથે સર્વગ્રાહી નેત્ર સારવાર ઉપલબ્ધ..
આશરે 5,600 ચોરસ ફૂટ વિસ્તારમાં વિકસાવવામાં આવેલી આ હોસ્પિટલમાં દર્દીઓ માટે વિશ્વસ્તરીય આરોગ્ય સેવાઓ ઉપલબ્ધ કરાવવામાં આવી છે. હોસ્પિટલમાં અદ્યતન મોડ્યુલર ઓપરેશન થિયેટર, આધુનિક ડાયગ્નોસ્ટિક સુવિધાઓ, ઇન-હાઉસ ઓપ્ટિકલ સ્ટોર અને ફાર્મસી સહિતની તમામ જરૂરી સેવાઓ એક જ સ્થળે ઉપલબ્ધ છે. દર્દીઓને ગુણવત્તાસભર સારવાર ઝડપથી અને સરળતાથી મળી રહે તે માટે નવીન ટેક્નોલોજીનો ઉપયોગ કરવામાં આવ્યો છે.
ઉદ્ઘાટન પ્રસંગે નાયબ મુખ્યમંત્રી હર્ષ સંઘવીએ જણાવ્યું હતું કે સુરત સતત આરોગ્ય ક્ષેત્રે નવી સિદ્ધિઓ હાંસલ કરી રહ્યું છે. શહેરમાં આવી અદ્યતન નેત્ર હોસ્પિટલ શરૂ થવાથી હવે લોકોને આંખની વિશેષ સારવાર માટે અન્ય શહેરોમાં જવાની જરૂર રહેશે નહીં. સ્થાનિક સ્તરે જ ઉચ્ચ ગુણવત્તાની સારવાર ઉપલબ્ધ બનવાથી દર્દીઓનો સમય અને ખર્ચ બંનેમાં બચત થશે.
હોસ્પિટલમાં મોતિયા (કેટરેક્ટ), ગ્લુકોમા, રેટિના, કોર્નિયા તથા બાળકોની આંખના રોગો સહિત વિવિધ નેત્ર રોગોની નિષ્ણાત સારવાર ઉપલબ્ધ રહેશે. અનુભવી તબીબોની ટીમ અને આધુનિક સાધનોની મદદથી દર્દીઓને ચોક્કસ નિદાન અને અસરકારક સારવાર આપવામાં આવશે.
સમાજ પ્રત્યેની પોતાની સેવા પહેલના ભાગરૂપે હોસ્પિટલ દ્વારા 31 ઓગસ્ટ, 2026 સુધી તમામ દર્દીઓ માટે મફત સંપૂર્ણ આંખ તપાસ કરવાની જાહેરાત કરવામાં આવી છે. આ પહેલનો હેતુ વધુમાં વધુ લોકોને આંખના રોગો અંગે જાગૃત કરી સમયસર નિદાન અને સારવાર ઉપલબ્ધ કરાવવાનો છે. હોસ્પિટલ સંચાલકોના જણાવ્યા મુજબ, ભવિષ્યમાં પણ સમાજને ગુણવત્તાસભર અને સુલભ નેત્ર સારવાર ઉપલબ્ધ કરાવવા માટે વિવિધ આરોગ્યલક્ષી સેવાઓ અને કેમ્પોનું આયોજન કરવામાં આવશે.