સુરેન્દ્રનગરના આંબેડકર નગર સ્થિત મિલન આઇકોન ખાતે ભારતીય વિશિષ્ટ ઓળખ પ્રાધિકરણ (UIDAI) દ્વારા નવા **આધાર સેવા કેન્દ્ર (Aadhaar Seva Kendra - ASK)**નો પ્રારંભ કરવામાં આવ્યો છે. આ આધુનિક કેન્દ્ર શરૂ થતાં હવે નાગરિકોને આધાર સંબંધિત વિવિધ સેવાઓ એક જ સ્થળે સરળતાથી ઉપલબ્ધ થશે. કેન્દ્રમાં નવા આધાર કાર્ડની નોંધણીથી લઈને આધારની વિગતોમાં સુધારા, ફરિયાદોના સ્થળ પર જ નિરાકરણ અને બાળકોના બાયોમેટ્રિક અપડેટ જેવી અનેક સુવિધાઓ ઉપલબ્ધ કરાવવામાં આવી છે.
સુરેન્દ્રનગરમાં આધુનિક આધાર સેવા કેન્દ્રનો પ્રારંભ, હવે સાતેય દિવસ મળશે આધાર સંબંધિત સેવાઓ
સુરેન્દ્રનગરના આંબેડકર નગર સ્થિત મિલન આઇકોન ખાતે UIDAI દ્વારા નવા આધાર સેવા કેન્દ્રની શરૂઆત કરવામાં આવી છે,બાળકો માટે મફત બાયોમેટ્રિક અપડેટ સહિતની સેવાઓ મળશે. મળતી માહિતી મુજબ, નવા આધાર સેવા કેન્દ્રમાં નવા આધાર કાર્ડ માટે નોંધણી, નામ, સરનામું, જન્મ તારીખ, મોબાઇલ નંબર સહિતની વિગતોમાં સુધારો તેમજ આધાર સંબંધિત અન્ય સેવાઓ આપવામાં આવશે. ખાસ કરીને 5થી 17 વર્ષની વયના બાળકો માટે બાયોમેટ્રિક અપડેટની મફત સુવિધા પણ ઉપલબ્ધ કરાવવામાં આવી છે, જેનો લાભ મોટી સંખ્યામાં પરિવારોને મળશે.
નાગરિકોની સુવિધાને ધ્યાનમાં રાખીને કેન્દ્રમાં આધુનિક ઇન્ફ્રાસ્ટ્રક્ચર વિકસાવવામાં આવ્યું છે. દિવ્યાંગજન માટે વ્હીલચેર, સુલભ શૌચાલય તેમજ માર્ગદર્શન માટે સમર્પિત ASK મેનેજરની વ્યવસ્થા કરવામાં આવી છે. ઉપરાંત, લાંબી લાઈનો અને રાહ જોવાની સમસ્યા ટાળવા માટે નાગરિકો અગાઉથી ઓનલાઈન એપોઇન્ટમેન્ટ બુક કરીને પણ સેવાઓનો લાભ લઈ શકશે.
UIDAI દ્વારા આગામી સમયમાં શાળાઓમાં વિશેષ બાયોમેટ્રિક અપડેટ કેમ્પ યોજવાની પણ જાહેરાત કરવામાં આવી છે. આ અભિયાન દ્વારા બાળકોના આધારની વિગતો સમયસર અપડેટ થઈ શકે અને ભવિષ્યમાં વિવિધ સરકારી સેવાઓનો લાભ લેવામાં સરળતા રહે તેવો હેતુ રાખવામાં આવ્યો છે.
આધાર સેવા કેન્દ્રના ઉદ્ઘાટન પ્રસંગે સાંસદ ચંદુભાઈ શિહોરા, ધારાસભ્ય જગદીશભાઈ મકવાણા, મેયર રાકેશકુમાર રાઠોડ, મ્યુનિસિપલ કમિશનર જે.કે. જાદવ (IAS), UIDAIના ડાયરેક્ટર રાજેશ કુમાર ગુપ્તા, ડેપ્યુટી ડાયરેક્ટર સંજુ બાલા સહિત અનેક મહાનુભાવો ઉપસ્થિત રહ્યા હતા.
નવા કેન્દ્રના પ્રારંભથી સુરેન્દ્રનગર અને આસપાસના વિસ્તારના લોકોને આધાર સંબંધિત સેવાઓ માટે અન્ય શહેરોમાં જવાની જરૂરિયાત ઘટશે અને ઝડપી, પારદર્શક તથા સુવિધાજનક સેવા ઉપલબ્ધ થશે તેવી આશા વ્યક્ત કરવામાં આવી છે.